KOLASIB DISTRICT-A LEILET NEIH DAN PHUNG ZIRNA

 Kan pi leh pute atanga tlangram nuam ti, chhem dam thli leh zotuithianga chawm len zofate kan ni a. Thlang an lo tlak lai pawh khan kan pi leh puten khawlphaite thlang lovin kan zotlang ram hi an rawn chuan a, a thlang lawkah phaizawl tha tak a awm tih pawh an hre ngei ang tih a rinawm. Mahse, hei hian an lung a dum tlat a ni. Mi lu la leh indova inrun thin, tlang chhipa awm hi an himna atan a tulin an mamawh tih hi chu thu hnuhnung a ni. He zia hi tun thlengin nghet takin kan la pu a, phaizawl hi nuam kan ti tak tak thei lo niin a lang. Manipur leh Kawlphai atangin kan unau ten he Zoram nuam hi ngaiin an lo haw khawm mek bawk a ni.


 Tlangram chu nuam tiin thlahlel mah ila, kan phaizawl neih hlutzia hi kum sawmnga kum sawmruk vel kal ta atang khan kan lo hre daih tawh a. Kan duhlo a, kan kalsan tawh kawlphai leh Manipur (Tuithaphai) phei lamah te leilet zawngin an lo pem chhuak leh tawh a. Zoram hmun hrang hrang atangin Chemphai ruam leh tuna Kolasib district chhunga kan phaizawlte leileta sual turin Sai leh Sakei te, Thosi bupuite an lo tawn darh tawh a ni. Chung chu tuna kan District leh Sub-Division ten kan chhuan em em phaizawl leilet hmunpui hi a ni.


 Kolasib district-a phaizawl awm zawng zawng zau zawng chu 5721 hactare a ni a, tah hian Bilkhawthlir Sub-Divisionah 2144.45 a awm a; Zawlnuam Sub-Division ah 1301.5 hactare a awm; Kolasibah 845.0 hactare a awm. A vaia Kolasib district a leilet developed tawh emaw, buh chinna zau zawng chu 3214.79 hactare a ni a. Bilkhawthlir Sub-Div. ah 1461.68 hactare a ni. Zawlnuam Sub-Div. a 556 hactare, Kolasib-ah 4190 hactare. Heta tanga Kharif buh thar theih zata chhut chu Bilkhawthlir Sub-Div. ah 55543.84 qtls., Zawlnuam-ah 19,460 qtls., Kolasib ah 14,556.0 qtls. Chutichuan Kolasib District pumpuia Kharif (Fur buh) chauhva buh thar thei chu 1,15,732.44 qtls. a ni. Leileta siam theih tuna la siam loh hi siam vek phei ila kan thar tam ngawt ang. Chu mai a ni lo, tai a chin theih a, kan chin leh thar zat kan chhut nghal lo zawk a. Hei bakah buh thar hlawk (HYV), tui si te hi ching ila, Mizoram tan Kolasib district hi kan va hluin kan va pawimawh em. Buh ni lo, thlai dang chin tha zawka kan hriat leh han ching nghal ila. Mahse, hetia hisap ang hi chu kan ni lo. Kan leilet neih dan phung a fuh tawk loh avangin.


LEILET NEIH LEH ENKAWL DAN TLANGPUI

Tunlai kan leilet neih dan tlangpui chu hetiang hian sawi ta ila:

    1)  Vai kan enkawl tir. Kum rei tak a ni tawh hlawm.

    2)  Buhpui atangin hauh zat kan nei a, kan la thin.

    3)  Kan lovah engzat nge thar kan hre tak tak lo.

    4)  Kan buh lak hi a thar atanga engzat nge tih leh vai, a enkawltuten engzat nge an chan chiah kan hre lo.

    5)  Kan lova thar tho tai atangin hauh kan nei lo a ni ber.

    6)  Kan lo enkawltu vaite hi kan control thei lo tlangpui a, chuvang chuan kan buh duh zawng emaw kan thlai duhzawng kan chin tir thei lo.

    7)  Tai ang deuhin, thlai dang pawh an ching thin, mahse kan thik lova, hauh kan nei ngai lo.

    8)  Kan leilet vaiin an enkawl dan hi kan ning thawkhat, tihdanglam erawh kan tum lem lo; sawrkar tihdanglam theih tur ni a ngaiin chhan ngaiah kan inngai tlangpui.

    9)  Sawrkar atanga land development, irrigation, land development, a free a thlai chi leh input dang dawn pawhin kan buh thar hauh zat kan tipung chuang lo.

    10)  Mahni chuan leilet hna thawh kan tum tawh lo hrim hrim.

    11)  Leilet enkawltuten bial tlang an sam ngai lova, hlo pawh an thlo vak lo.

    12)  Tractor leh Power Tiller neihte hi vi thlakna tura ngai deuh vek kan ni. Sawi tam leh sawi sei vak ngai lovin an fel lohna leh siam that ngai laite chu kan hai lo theuh.


THLIR DAN LEH RUAHMANNA


 Kan sawi tak ang khan leilet neituten kan leilet vaiin an enkawl dan hi kan ning ve tawhin tihdanglam pawh kan chak tawhte pawhin a lang a. Tihdanglam tum phei chu kan la awm lem lo. Hei hian kan ning tak tak lote pawh a ti lang thei . Chuvangin kan leilet neih dan phung tidanglam turin hetiang hian ruahmanna siam ta ila.


1.  LEILET NEITUTE TUMNA :


 A neitute ngeiin an tum hma chu kan leilet neihdan phung hi kan thlak lovang. Vaiin min enkawl sak lovang tih kan hlau hi a dik a; vai dang, min enkawlsak chak, kan leilet enkawl hi a vanneithlak a ni tih hria, leilet enkawl thiam tho tam tak an awm tih hriat ngam a tha a. Thlak tum rilru put a, khawkhata mi emaw, zau khat ami emaw sawm telin intiam ruala bul tantu nih a ngai. Tunge hmahruai ang le?


2.  INCHHAWR DAN TIHDANGLAM :


 A tira kan sawi tak angin tlang thengthaw ngaina, hmun hulhara khawsak nuam ti chi kan ni a. Leileta indai berha leilet hna thawh kan peih rei lo. Tlangram lo nei chi, huan thlai, thei leh kuhvate enkawl chi kan ni. Chutiangin vai te hi kan chhawr zui zel a ngai ang. Mahse, kan chhawr ang a, an thawh hlawh kan pe tur a ni. Leilet atan kan chhawr anga an thawh hlawh kan pe ang. Buh phunah kan chhawr ang a, an thawh hlawh kan pe leh ang, chutiang zelin labour-ah ka hmang tawh ang. Tuna kan chhawr ang ni lo hian. Tuna kan chhawr danah hian tumah demtur dang an awm lo. Zoram hmun dangah pawh he laia hnamdang kan chhawr ang ni lova leilet enkawltu chhawr an awm tho.


3.  KHAWL HMAN :


 Khawl hman hi a tha, a chak a, a hna a tha bawk. A theih chin chinah kan hmang tur a ni. Vai thlakna atana ngaih leh khawl neih huna leilet enkawl dan phung tidanglam tura inngaih hi a hmanhmawh loh thlak khawp mai. Khawl tih chi a awm a, khawl tih theih loh chi a awm. Tih theih tur pawh nise kan hmang mai lovang. Entirnan : Buh phun leh hlo thlawh, a seng thlengin.


 Bilkhawthlirah Tractor 6 a awm a, Leilet hnathawh nana hman chu pakhat chiah a ni. Power Tiller chu thildang a hman chi vak anih loh avangin a awm chhun 2 chu farm operation atana hman a ni. Chutiang bawkin Vairengteah pali a awm a, farm operation atana hman chu pakhat chauh a ni. Phaisen leh Buhchangah pawh Tractor 1 ve ve a awm a, farm operation atana hman a ni lo. Hei hian tractor te pawh hi neih belh ila, operator (Driver) te Mizo tho an nih chuan kan tuipui rei tak tak a ngem tih hi min ngaihtuahtir nasa, Mechanisation kan sawimawi lai leh vai thlakna atana beisei lai mek hian.


 Kum 2008 leh 2010 inkara pilot project atangin Kolasib District pumpuiah tractor 3 leh power tiller 68 subsidy in loneitute hnena pek a ni a, hei hian lo neih dan phung pawh thlakin nasa taka kan thlai thar leh a hlawkdante pawh tidanglam thei tura beisei ngam a ni ang.


4.  HMASAWN ZELNA KAWNG A DAL :


 Hmasawnna kawng kan zawng tak tak dawn anih chuan kan District tan leh Sub-Division tante, Cropping Pattern leh Cropping System tharte kan duang tur a ni a. Market thlirin thlai chin tur leh thlai rau rauah pawh a thar hlawk, a tui chi, rannung leh natna laka fihlim, khawlum/khawvawt ngam, kan area mil tur dap chhuah tur a ni a. Chung ngaihtuah buai chu a sawt hrih lem lo, kan inher danglam hma chu.


5.  MARKETING SYSTEM THA :


 Agriculture-a hma sawn tak tak kan tuma tan kan lak dawn chuan marketing system tha, kan thlai tharte man man zawka rang taka deh ral theih a tul. Chu chuan hma a hruai pawh a ngai. Duhthu sam chiah lo mahse, kan kuhva leh hatkora market-te a that deuh avanga kan phurpui dante pawh hi entirna pakhat a ni.


 Marketing system, tha nei turin sawrkar a chet a tul a, Sawrkar, Department emaw Cooperative Society/Corporation nung tha takin a buaipui a tul. Infrastructure tha, kudam, motor leh thildangte hi thil pawimawh a ni. Chuti anih loh chuan hralhna emaw a thehthang danah kan buai tho vang. Tuna sawhthing, sangha leh thildang kan buaipui ang hian.


 Agriculture marketing hi a dang a, Industrial product market ang a ni lo. Trade & Commerce Dept. leh MAMCO-te pawh kan nei. Chet tak tak a har. Society-te pawh din ila, Agriculture leh marketing a kan chian loh chuan kan thleng sang lovang. Eng nge kan buaipui tura chu, engzat nge kan chin, engzat nge kan thar, tute nge lei duh, khawi hmunah nge, tihte hi marketing season thlen hmaa lo survey lawka hriatsa a ngai. Hei hi thlai zawng zawng tan a ni.


 Tuna kan lo neih danah hian chung chu kan hre thei lo. Engzat nge thar ang a, engzat nge marketable surplus ni dawn tihte hi kan leilet neih dan phung siksawi fel hmasak phawta hriat chi a ni. Buh chauh a ni lo, tuna state pawna kan buh thar chhuak nasa leh leilet neituten vai hnena an hralh thin hi kan ngaimawh anih chuan leilet neih dan phung tihdanglama marketing thaa thawi danglam chi a ni.


 TLANGKAWMNA : A tawpna atan chuan ei leh bara kan intodelh nan emaw Zoramin hma kan sawnna turin keini Kolasib district hian kan leilet enkawl dan hi kan tih danglam a, marketing system tha kan neih a tul. Rilru tak taka Zoram tana tan la turin ka sawm a che u.

Source : Lalthanzuala
MSc.(Ag) ,Agro, PG Dip.Agmark
Thlai chin dan
Department of Agriculture (Crop Husbandry)
Mizoram
Page No : 173- 176
First Edition-2011

Download